19. desember 2008

partí og piparkökur (og glaður ráðherra?)

Í gær veitti Bókmenntasjóður fimm nýræktarstyrki. Fullt af sætu skáldfólki fékk tvöhundruðþúsundkalla og túlípana í Nýlistasafninu og Þorgerður Agla bauð upp á piparkökuhjörtu, konfekt og vín. Samkvæmt frétt í Fréttablaðinu í dag, sem undirrituð er af pbb, veitti Þorgerður Katrín Gunnarsdóttir styrkina og var ekki annað að sjá (að sögn fréttablaðsgreinarinnar) en að menntamálaráðherrann væri "glaður eftir að hafa komið þessum útgáfum og höfundunum til aðstoðar í útgáfunni." Druslubókadömurnar eru ekkert of góðar til að mæta í boð sem þeim er boðið í og þess vegna vita þær að menntamálaráðherrann komst ekki í Nýló í gær. Því ríkir algjör nagandi óvissa um hversu glaðbeitt hún var af þessu tilefni. Hins vegar voru þeir sem mættu alveg dúndrandi hressir og í miklu stuði. Partíið hélt síðan áfram því strax á eftir var útgáfubjóð á vegum Omdúrman vegna bókarinnar Díana í snjónum og þar var allt vaðandi í heimsfrægu fólki jafnt sem fögrum sveitamönnum.
Í dag fær svo rithöfundur pening frá Rithöfundasjóði RÚV. Druslubókadömum hefur ekki verið boðið í neinn gleðskap af því tilefni og því er alls óvíst hvort það verður nokkuð stuð í partíinu.

P.S. Myndasmiður þessarar síðu er enn í losti vegna konfektáts og víndrykkju. Hafi hann ekki týnt myndavélinni á skrölti um hála vegi næturborgarinnar birtast hér hugsanlega fljótlega myndir af glöðum skáldum.

6 ummæli:

ÞES sagði...

kannski höfum við ekki tekið eftir menntamálaráðherra...varla eru dagblöðin að skrifa vitleysu og uppspuna...eða þannig:)

Þórdís Gísladóttir sagði...

Kannski var Þorgerður Katrín dulbúin sem ungskáld og lífskúnstner.

Hvernig er annars með þessar fimmhundruð sálir sem koma hingað dag hvern til að sækja sér visku og gleði? Það skrifar varla nokkur komment hérna nema við sjálfar. Langar virkilega engan að dissa okkur eða ljúga að við séum algjör krútt?

Nafnlaus sagði...

Þið eruð algjör krútt ... eða eitthvað ...

Nafnlaus sagði...

Aðdáandi númer eitt kvittar og þakkar fyrir sig :o)

Eiríkur Örn Norðdahl sagði...

Ég myndi skrifa ástríka athugasemd hér í hvert einasta skipti sem ég lít við, sem er mörgum sinnum á dag, ef ég væri ekki svona fullur af heift vegna kategórískrar hunsunar ykkar á ljóðlistinni - sem er kannski ekki kategórísk, en ég hef sem sagt veitt þessu athygli - hverjir haldiði hafi áhuga á einhverjum prósaleiðindum, línulegum doðröntum um alls ekki neitt?

Þið eruð reyndar búnar að birta eina mynd af ljóðskáldum, þannig að þetta stendur allt til bóta greinilega - og fyrir þá mynd fáið þið þessa athugasemd.

Þórdís Gísladóttir sagði...

Ég var einmitt að spá í að fara að skrifa um sjóðheitu ljóðabókina hans Páls Ólafs - djók!