15. desember 2008

Anne-Cath Vestly

Norski barnabókahöfundurinn og leikkonan Anne-Cath Vestly fékk, að sögn norskra fjölmiðla, hægt andát í nótt. Hún var 88 ára gömul og um skeið hafði hún þjáðst af alzheimer-sjúkdómnum.

Anne-Cath Vestly skrifaði tugi barnabóka og margar þeirra komu út á íslensku fyrir nokkrum áratugum. Fyrst skal nefndur flokkurinn um Óla Alexander Fílibomm-bomm-bomm, en fyrsta sagan um hann, sem kom út í Noregi 1953 var þýdd á íslensku 1960. Síðan má nefna sögurnar um systkinin átta sem búa með ömmu sinni, hundinum Stuttfæti og foreldrum í skóginum og bækurnar um Áróru sem býr í blokk X ásamt litla bróður sínum Sókratesi. Mamman kemur lítið við sögu í Áróru-bókunum því hún vinnur úti en systkinin eiga heimavinnandi föður. Loks má nefna sögurnar sem fjalla um strákinn Litla bróður sem leikur sér oft með trjágrein sem hann kallar Stúf.

Það er erfitt að ímynda sér að þessi hlýlegi höfundur hafi einhverntíma verið umdeildur en raunin er sú að á sjötta og sjöunda áratugnum voru landsmenn hennar ekki allir sáttir við hana. Anne-Cath mun, mörgum foreldrum til skelfingar, hafa frætt krakka sem hlustuðu á barnatíma útvarpsins á að storkurinn kæmi ekki fljúgandi með ungbörnin og margir fundu að því að pabbi Áróru væri óttalega lufsulegur og léleg fyrirmynd þar sem hann spígsporaði um með barnavagn á milli þess sem hann hékk heima hjá sér og skrifaði óskiljanlega doktorsritgerð um forn-Grikki.

10 ummæli:

Erna sagði...

Hvað á þetta að þýða að bæði Anne-Cath. Vestly og Horst Tappert deyi sama daginn? Mér finnst eins og æska mín sé að gufa upp!

ÞG sagði...

Já, það er mikið á fólk lagt á þessum myrku tímum. Ætli Bobby í Dallas og Laura Ingalls hrökkvi uppaf næst?

Karl sagði...

Þið eruð ágætar en á ekki að skrifa neitt um nýju bókina um hann Grím amtmann?

ÞG sagði...

Þú segir nokkuð! Alveg myndi ég lesa bókina um einbúann Grím með gleði og ánægju væri hún í hillunni hjá mér. Kannski tek ég á hana á bókasafninu einhvern daginn :)

ÞG sagði...

En svo er náttúrlega spurning hvort til dæmis Þorgerður er með Grím amtmann á náttborðinu eða hvort Erna er búin að lesa hana á kaffihúsinu í Eymundsson? Það eru margir óvissufaktorar í þessu máli.

Erna sagði...

Ekki búin að lesa einbúaamtmanninn enn - geri ráð fyrir að bókin sé lengri og efnismeiri en svo að hún henti til lestrar í bókabúðum (nema þá kannski sem langtímaframhaldssaga). En ég hef áhuga á að lesa hana einhvern tíma - spurning hvort það upphefst blóðug barátta hjá okkur druslubókadömunum um það hver hreppi amtmanninn.

Æsa sagði...

Pant ekki ég!

ÞG sagði...

Ég er einmitt búin að panta hana á Borgarbókasafninu í þínu nafni Æsa.
Hef heyrt að Grímur sé karakter svona mitt á milli Tony Soprano og lögfræðingsins Bjurman.

ÞG sagði...

En ég sleppi þér við Grím Æsa ef þú tekur Váfugl eftir Hall Hallsson.

ÞES sagði...

Ég hef mikinn áhuga á því að lesa Váfugl